奶茶麥皮爭玩具之一

好好笑~~~ 麥皮死都要搶奶茶個玩具... 最後變咗奶茶拖住麥皮行街咁... 奶茶仲要用個bb聲嚟引麥皮

奶茶換牙仔

奶茶唔經唔覺已經到咗換牙嘅階段, 初初都係甩咗三隻細嘅先, 呢兩日就執到兩隻大嘅, 個衰仔好口密... 唔俾我睇吓佢啲牙仔... 我上網見啲人話會無胃口... 要浸糧俾佢

但我見佢開始甩牙之後嘅胃口都係唔錯... 所以淨係浸過一次糧俾佢, 仲要係少少濕嘅啫... 而且又精精靈靈... 一日同麥皮玩到黑...

麥皮呢兩日惡咗... 同奶茶玩會凶返佢轉頭, 我諗係因為奶茶會讓住佢... 麥皮一嗌奶茶就即刻彈開... 驚整親佢... 仲會讓位俾佢瞓... 不過我唔會咁造大麥皮架... 個衰女已經百厭, 造大咗佢仲得了!!!!

所以我都係餵就餵咗奶茶先, 摸又摸咗奶茶先, 不過麥皮嚟咗之後, 我覺得奶茶定咗, 都係貪玩奀皮, 但無之前咁百厭。

細身/大身???

我記得初初養奶茶時, 會去諗佢會唔會好大隻, 因為我喺勝利道買...

買咗返嚟先擔心俾人呃(死蠢)...

有朋友同我講... 俾少啲佢食, 用個細籠困住佢, 等佢無乜活動...

但我無咁做過, 我會擔心佢餓親, 無地方俾佢玩...

到宜家, 耐無見奶茶嘅朋友都會話佢好大隻, 但我唔覺... 而且就算佢大定細都係我隻仔... 我最錫嘅仔。

宜家麥皮嚟咗, 佢夠細隻喇啩!!... 但我又擔心佢脆弱得滯易整親... 不過三個月嘅佢嚟講的確奀咗啲...

奶茶!!!麥皮!!!~~~ 快高長大... 大定細都係媽媽最愛嘅仔女。

ps..奶皮媽嘅媽媽(即外婆啦 !)最反對奶皮媽養狗一事... 但見到麥皮都心都軟晒..仲叫我呵住添呀.. 呵呵因為嗰日麥皮打完針... 成隻乖晒~~哈哈哈

麥皮打第二針

尋日帶咗麥皮去打第二支針, 因為見佢有幾聲乞嗤... 好擔心佢有傷風唔打得住, 好彩醫生話佢好精神無病無痛, 打完針去咗幾間pet shop買玩具俾佢哋兩隻嘢時, 個店員不停讚麥皮靚女又細身, 個心飄飄然,梗係啦... 個女俾人讚喎。

之後返到屋企麥皮開始對支針有反應, 無咩精神, 係咁扭計發脾氣, 因為奶茶都係咁, 所以先有心理準備, 仲記得奶茶第一次打完針返嚟個樣牛牛斗斗, 過多一兩個鐘直頭掂佢會嗯嗯聲好似整痛佢, 當時好擔心佢整親邊度, 好彩奶爸提醒我醫生講過打完針會有啲牛牛斗斗, 可能我哋隻仔唔舒服啫!!今次麥皮一樣都係咁時都無嗰時咁驚青。

嘿嘿... 趁佢打完針無咩精神就係幫佢整呢整路嘅時候啦!!!! 因為呢幾日發現佢成日搖個頭, 跟住睇吓佢耳仔... 積咗好大舊耳屎... 就咁洗耳都整唔到出嚟... 一定要抆耳毛... 因為佢無氣無力就可以好專注咁幫佢抆... 因為無精精靈靈時咁郁身郁勢。一抆抆咗成個鐘咁滯.. 先抆走晒佢啲一舊二舊... =.=之後洗埋耳仔... 終於完成啦!!! 順勢幫奶茶洗埋... 每次同佢洗耳仔就好似打交咁... 衰仔會極力反抗... 幾經辛苦先洗到。莫講話抆佢耳毛...

估唔到麥皮牛斗到今朝都無咩精神... 不過到我下晝返屋企時已經可以好大聲咁扭計... 就知佢醒晒啦!!!!!

打交/玩???

宜家放親麥皮出嚟同奶茶玩... 就會好似玩緊捉迷藏... 麥皮細細隻可以"捐"入梳化底

但奶茶大個仔淨係伸到個頭入去... 麥皮喺梳化底下面'捐"嚟"捐"去, 奶茶就圍住張梳化跑嚟跑去... 初時我好擔心奶茶會整麥皮架... 不過見麥皮真係痛時會嗌同奶茶會即時成隻彈開就知道佢哋都係玩緊...

但奶茶玩得好狼... 一咬住麥皮隻腳/尾... 就成隻拖行自己前面... 早兩晚見涼涼地俾咗件衫仔麥皮著... 奶茶就係咁咬麥皮件衫... 拖嚟拖去.. 又fing佢... 十足當係自己玩具咁... 不過麥皮都唔弱... 一出聲... 奶茶即時彈到遠遠...佢就趁機捐入梳化底

有幾次我發現奶茶喺籠入面同麥皮玩會斯文啲... 所以試吓將佢哋放喺大個籠度... 初時麥皮唔理奶茶時... 奶茶真係好斯文架... 點知兩個一玩就癲... 係咁碌嚟碌去... 麥皮俾佢扎親點算 =.=... 所以最後都係分返開佢哋喺各自個籠入面

sit & down

其實麥皮嚟到初時... 我發現佢有搶食嘅情況, 每次開餐都嗯好耐... 我先肯俾佢食... 但佢每一次見到啲嘢食都會震得好犀利, 所以我嘗試用手餵少少俾佢... 等佢知道要冷靜先俾佢食... 但每俾一次之間佢都會嗯嗯聲... 扭計扭得好犀利... 唔知係唔係奶茶嚟嘅時候無咁, 所以我比較唔識處理。

喺初初呢段時間我都有教佢sit同down, 但我今日開始發現佢原來錯亂咗, 佢知道做呢兩個動作會有嘢食, 但其實做邊個仲未肯定到... 所以我一嗌"sit"佢會好不安咁坐下又扒下。

所以我決定要教識佢sit得好冷靜先可以俾嘢佢食。

這一年

呢一年, 我諗最大變化應該係養咗兩隻小狗啦~~~

記得養奶茶(啡色嗰隻)時, 咩都唔識, 一手湊大嘅感覺真係好特別, 見到奶茶聽我話, 我講嘢會望住我, 鬧佢時會低頭, 偷做錯事時落荒而逃, 每一個反應都令我好好笑(有時都好嬲)

慶幸係, 到宜家為止都未曾令我十分擔心過... (最擔心嗰次應該係我唔小心踢佢一腳, 成隻跣走, 佢仲要即喊)

宜家奶茶有七個月大, 我覺得佢好細膽, 出到街有時會俾車聲嚇親... 見到外人又會好興奮, 最衰就係我呢個媽媽無好好咁成日帶佢落街, 直到宜家無工返先勤力啲帶佢落去, 等佢大個仔啲。

亦都喺呢個時候我決定養多隻~麥皮... 初初見麥皮時都覺得佢仲百厭過奶茶... 仲要大膽啲, 心諗... 唔... 奶茶應該會俾佢蝦... (果然無俾我估錯)

最記得麥皮嘅事, 就係個衰女包竟然可以爬出籠頂, 仲喺上面跌落嚟, 我一睇漏眼就發生咗, 佢今次同奶茶嗰次一樣~~~即喊... 但好彩無跌親, 個衰女仲每次開籠頂都識爬出嚟... 伸半個身出嚟... 真係唔怕死

麥皮嚟咗之後, 我睇到最大變化嘅係奶茶定咗好多, 唔知係唔係有個細嘅喺度, 會定性啲呢, 但最開心係佢哋相處都好好, 不過麥皮仲細, 唔適宜俾佢成日同奶茶玩, 因為我驚奶茶會意外地整親佢e.g扎親佢。

今日, 我突然醒咗咁諗, 點解唔記得佢哋嘅每一件事呢, 所以我決定從新再寫blog, 寫低每樣嘅佢哋發生過嘅事, 唔好等自己唔記得... 因為我記性真係唔好

我upload咗好多相去相薄架啦... 去睇吓佢哋啦!!!!