26/12/2012 開心散步去

麥皮:

扑星day 好好天~ baba帶我哋周圍行


1.

25/12/2012 開心聖誕趴地

奶茶:

話說有人好開心, 話我可以喺趴地前出關
大奶茶佢哋邀請我哋出席聖誕趴地呢~ 
聽聞仲有廿幾人廿幾毛小孩~ 見咁多朋友仔我就最開心架啦 

但mami又掛住自己開心, 前一晚去玩到成三點幾先返

於是乎第二朝就遲起身... 趕頭趕命咁出門口, 仲要啲朋友仔等佢哋先出發
要大家等真係唔好意思啦 

於是就向大棠自然教育徑出發啦~
我好開心, 行都特別有衝勁
呢條路以前我哋都行過一次架啦
上次我哋係去大欖涌水塘, 所以後半段嘅路都未行過呢
不過都唔算難行, 係多啲樓梯路 (妹妹最開心, 因為抱咗一大截路 )

行完之後我哋就去咗草地跑跑, 未放夠電嘅我梗係繼續去八啦
玩咗一陣就夠鐘去大人bbq嘅地方
跟住大人開心燒嘢食, 我哋梗係都有份食啦 
唔覺唔覺原來都已經玩到四點
朝早七點先收工嘅baba加瞓咗三個幾鐘嘅mami已經無電 (仲渣過我哋 )
於是提出早走, 仲焗住大家要抽獎先呢~  (真係唔好意思)

不過都好多謝大家帶俾我哋開心歡樂嘅一日

今次啲相mami都好滿意呢~ 希望各位朋友仔都喜歡啦!
雖然唔能夠每一位朋友仔都影到相

(1)

15/12/2012 偷步跑跑

麥皮:

等我話個秘密大家知, 哥哥覆診前一日

其實已經偷步落街跑跑~ 

星期六, mami見到好好天, 就忍唔住話要帶我哋落樓影下相喎~

話佢個相機就嚟發毛

(之前有人唔知點解抆咗防潮箱個電掣, 早排仲要濕到不得了, 發現時防潮箱已經7x% )

我同哥哥就可以去跑跑啦 

(1)

(2)

(3)

(4)

(5)

(6)

(7)

baba, 快手啲啦~
(8)

(9)

(10)

(11)

(12)

(13)

(14)

mami話哥哥呢個樣可愛到不得了 
(15)

(16)


話甘快又玩咗一個鐘, 拜拜你條尾 
(17)

16/12/2012 奶茶: 慢醫生, 多謝你~ 希望唔好咁快再見你啦

奶茶:

尋日我又要去探慢醫生啦, 不過mami話呢次應該係最後一次架啦我哋早到咗, 醫生未返到, 所以我哋喺附近行咗一陣先見醫生呢
入到診所我就死命抓實baba唔放, 佢想放我落枱, 我都立即要撲住baba

我都唔明mami, 邊有人見醫生見得咁開心架
笑笑口咁同醫生講我已經無再嗌痛
我已經驚到騰騰震 

mami問醫生, 我仲要食幾耐藥會完全康復,
因為我宜家去廁所都仲會有少少反應, 只係未至於大嗌痛
醫生話最好食多二至四個禮拜"維他命B1, 6, 12"

因為市面上都有綜合性嘅B雜買
醫生話, 綜合性B雜都好好, 因為夠全面
而我宜家食緊嗰隻b1, 6, 12就係針對神經修復嘅補給
劑量會有分別
當然我之後可以繼續補給綜合性B雜市面上售賣嘅B雜劑量已經控制好好, 好少會出現中毒情況而且綜合性B雜係一個好全面嘅補給
對身體各部份都有唔同好處
不過因為我仲後生, 吸收唔晒只會浪費
等如我都可以食妹妹嘅葡萄糖鞍, 但因為我關節無受損
日日服用都只係浪費, 因為發揮唔到功效,
間中補給已經可以,
所以醫生建議我食B雜都可以間中補給
如覺得我痛楚情況再發生就可以俾密啲

開始時就俾兩個星期, 停兩個星期
之後就可以每個月只係俾一個星期

MAMI問醫生, 食療方面有咩我特別需要食多啲
醫生話, 最佳食療就係咩都要食
均衡就可以, 佢有見過有狗狗十幾歲依然非常健康,
狗主表示基本自己食咩, 狗狗就食咩,
吸收均衡就會健康

最重要嘅, MAMI梗係問醫生我可以去玩未
醫生話我已經咩都可以做架啦~
吸收多啲陽光... 製造多啲維他命D~ 幫助吸收鈣呢
所以我宣佈, 我可以出關啦)))))))))))))))))))))))))))))))))))))))))))))) 
之前都係喺樓下散步, 放繩都無呢 

最後醫生摸摸我頭仔
嗌我去玩多啲啦~ 跟住就走得啦
醫生有問MAMI會自己買B雜定繼續食B1,6,12
最後MAMI決定食住醫生藥先, 到時再決定買唔買B雜

同時醫生提醒mami, 我4kg重應該每日最少要飲到 200ml水 (大約兩支益力多嘅份量)
間中有時間就將我同妹妹分開一日,分開觀察計算我哋飲咗幾多水呢

慢醫生, 如果我一開始見完肥醫生就嚟睇你,
我相信我無咁驚你架~
不過我都好多謝你 
CAU 嘅 DR. ALEX LI


估唔到呢度都有得靠山邊行,一邊排水道, 好好行呢~ 不過勁多雀仔
(1)



(2)

(3)

診所隔離有棵聖誕樹, MAMI要我同佢合照呢
(4)

因為MAMI好滿意我咁合作, 獎咗我好大舊零食呢
(5)

醫生返咗啦~ 我好緊張呢
(6)

奶茶: mami話我好返啦~ 耶~

奶茶:

話說我上次睇到外籍醫生話我大便太硬而要轉濕糧,
但因為全濕糧後我嘅情況都無改善而mami話灣仔嗰間協會啲醫生好多又好難book返同一個,
所以唔想再去嗰度睇
同埋醫生唔睇返上一個醫生寫嘅嘢, 係要搞我pat pat 
所以mami又再幫我尋覓明醫
今次就去太子睇老友記番茄薯仔fergie bailey, 連Niza都係睇佢嘅慢醫生
因為醫生講嘢好慢, 解釋得好慢條斯理, 所以mami嗌佢做慢醫生
其 實一開始唔係諗住照腸鏡, 就一早去咗睇慢醫生啦


話說上次24/11/2012 我第一次見慢醫生
醫生好仔細咁每一條骨, 每一節脊骨都摸勻, 
不過因為我試過咬親靚醫生嘅助護,
mami驚我今次都會咬醫生, 所以我要戴住口罩
跟住又拉我啲手手腳腳, 仲嗌我行俾佢睇添不過因為戴住口罩, 我唔鍾意行, 索性四腳趴喺地以示抗議
醫生立即問我係咪平時都會咁樣唔願行
mami即刻解釋我係因為口罩先唔願行, 於是我就可以除低個口罩啦有得行我梗係開心到不得了,
佢哋仲要放咗好大包狗糧喺地... 我爭啲流口水添呀
其實醫生都話無發現我有邊度係特別反應
之後醫生話因為之前已經試過脊骨受傷同大便軟硬方向嘗試
咁今次試下巡椎間盤病變嘅方向下藥 
意思係, 有可能係我脊椎有一節中間嘅軟組織,
喺遭壓迫嘅情況下影響咗依附喺脊椎內嘅神經, 
所以每次去廁所時弓起背令到有關病變位置受壓而痛楚,  所以大嗌
一聽到椎間盤, mami已經嚇到個心跌咗落地, 
醫生仲話如果方向啱, 治療方法就要喺確實位置開個窿,
用激光用將神經受壓嘅位置嘅軟組織打細,
之後醫生開咗一啲類固醇同一種脊椎軟組織補給品, 觀察一個星期後覆診
跟住mami就過咗一個星期心驚膽跳, 複雜嘅心情係
希望藥有效, 起碼搵到病因,
唔希望藥有效, 唔想我係椎間盤發生任何問題
但呢個星期我都無起色... 食咗四日藥有一晚mami 同baba嗌我去廁所時我竟然無嗌
mami仲以為藥真係有效時, 但跟住幾日都係有嗌痛 


1/12/2012 我第二次見慢醫生因為mami擔心我上次戴住口罩會有抗壓性唔出聲
所以今次嗌醫生摸多我一次
今次baba企喺我面前, 我眼仔碌碌咁望實baba, 醫生喺後面係咁摸我
mami見到原來我個樣好精靈咁, 但個身震到不得了 
不過醫生摸完都係同一個結論, 覺得我無邊個位置有特別反應
跟住醫生問baba同mami, 如果就過去一個禮 拜嘅康復程度, 100分滿分
佢哋會俾幾多分, baba就話只有五十, 其實mami心諗應該再少

醫生表示, 如果連椎間盤無問題, 咁就可以再試下一個方向 -- 神經受損
同椎間盤病變嘅神經壓迫唔同
醫生解釋, 因為脊椎係一個管導將各部位神經由大腦再分怖去應有嘅位置
但因為奶茶嘅脊椎因為其中一次嘅跌倒或者長期勞損 (跳,樓梯, 指令)
導致奶茶脊椎受壓迫而令括約肌嘅神經受損, 所以我只係便便嘅時候先痛
而醫生亦都話其實如果真係咁就容易好多,
只要補充維他命b雜, 幫助受損神經嘅修補
不過都要再食相應嘅止痛消炎藥,
mami唔想我再食類固醇, 所以醫生今次無俾類固醇我lu
今次醫生俾兩個星期藥我食,
仲好肯定咁話應該呢個方向係正確, 如果都係唔得
就索性下次去到直接去聞氣, 高壓氧
醫生解釋高壓氧係一個較高壓力嘅箱入面聞氧氣,
喺高壓力會幫助自身釋放桿細胞去修復受損細胞

跟住mami問醫生, 需唔需要活動嘅限制
醫生表示, 唔需要限制, 如我係自發性嘅行為, 無必要去制止
不過唔好引導我做一啲會令脊椎受壓嘅指令 
但唔建議運動或玩得太過劇烈, 可以散步但唔適宜行山呢類太多斜路嘅地方始終仲未確診, 為免節外生枝因為其他因素而導致脊椎再有問題
醫生亦解釋俾mami知, 狗仔嘅直腸其實好短,
如果之前已經有兩個醫生都檢查過無異物, 佢亦覺得唔需要再去檢查 (我好多謝醫生咁尊重我個肛門)

跟住睇完呢次醫生, mami同baba都有種鬆口氣嘅感覺
因為醫生語氣輕鬆而且令人放心, 亦感覺到唔會係大問題
連拉親膊頭變硬頸四嘅baba都竟然覺得條頸都鬆咗
食咗一日藥之後, 原本兩老都諗住用指令嗌我去廁所, 
而佢哋又可以預備拍片俾醫生睇, 因為之前一個禮拜都係日日拍片俾醫生睇
不過我喺第二晚食完晚飯, 就自動自覺咁去廁所, 仲要無大嗌
baba同mami睇住我突如其來嘅舉動, 開心到不得了
仲請咗我食好大大舊雞柳零食


到今日已經維持咗一個星期, mami話我已經無再大嗌
已經唔使baba mami嗌指令, 我都會自動去廁所亦打咗電話俾醫生匯報咗我嘅情況,
只要食埋呢個星期藥再見多次醫生決定我仲要食幾耐維他命b雜就可以了 

mami亦都可以好放心咁俾我打呢篇blog話俾大家知, 我好返架啦多謝咁多位嘅關心, 我好快就可以出關去玩架啦
mami仲話經過今次之後, 唔會再要我做任何對脊骨唔好嘅指令
e.g. 請請, 企, roll, 爬, bang
最緊要我健健康康, 識幾多嘢唔係最重要
簡簡單單嗌得聽我sit, 已經好足夠

因為呢排都無乜影相, 只係一啲手機影嘅相
有mami fb嘅朋友仔都應該見過架啦


睇完醫生mami就嗱嗱聲同我剪毛
之前因為擔心(同時係懶) 我唔可以企咁耐, 所以無幫我剪毛
(1)

我終於變返瘦仔, 唔係肥仔啦
(2)

宜家天氣咁凍, 我哋最鍾意就係黐住mami個大脾
當然, 要mami注意我, 梗係要用啲方法嘅
(3)

明知我已經喺mami大脾, 依然要扭上嚟嘅妹妹
仲要瞓到紮住我, 唔想我傷到脊骨嘅mami梗係好快就抱走晒兩個 
(4)



(5)

終於連妹妹都剪埋毛啦~
(6)



最後, mami 多謝肯細心睇晒全篇文章嘅您哋