牛皮骨

我兩隻寶貝... 見到牛皮骨就開心架啦

特別奶茶, 一見到就唔到消滅佢都唔會停

個口可以唔停係咁咬咬咬咬... 最好笑係佢會咬甩一邊係咁嚼嚼嚼嚼... 好似食香口膠咁... 叫佢都係咬住咁望你

所以我同奶皮爸都叫呢啲做香口膠

早幾日俾咗一大一細嘅牛皮骨佢哋玩

麥皮個衰妹奶茶咬邊件就追住嗰件咬... 奶茶又好心地... 一俾麥皮搶咗就去搵第二舊

總之個口就唔停得

 

麥皮落得街啦

隔咗半個月先update blog... 因為奶皮媽嘅爸爸身體唔好... 所以奶皮媽無心情

不過宜家好啲啦

講返上個禮拜帶麥皮去打針先啦...

因為奶茶宜家有兩排牙仔... 奶皮媽擔心奶茶要脫牙仔... 所以就揹埋奶茶去見吓醫生啦

一個女人仔... 揹住三個袋... 因為驚麥皮打完針... 奶茶會整到佢個針口... 所以分開袋

都咪話唔論盡... 最重要係奶茶宜家成六磅幾七磅... 揹咗上膊都好攰

今次麥皮好叻... 竟然一聲都無嗌過... 以前奶茶打... 打完仲嗌緊... 十足十喺度鬧醫生咁

幾經辛苦終於揹返佢哋返屋企... 的士司機仲唔收我附加費添... 幾開心

初初我仲俾佢哋喺埋一齊玩... 但麥皮開始牛逗... 連奶茶撩佢玩都無反應

後尾就直頭奶茶過去掂一掂佢都扭計嗯咗幾聲...

所以要分咗佢哋... 困咗麥皮入返細籠... 不過佢都係瞓瞓瞓瞓...

到尋日... 奶皮爸同奶皮媽好開心咁終於可以帶兩個一齊落街又無落雨

比起奶茶第一次落街... 麥皮易帶好多

因為奶茶第一次落街時... 細膽得滯.. 聽到好多唔同嘅聲唔敢行...

行兩步就坐喺地... 你拖佢咩... 佢直頭扒喺地

一段五十米嘅路程行咗大半個鐘都未行完

但今次麥皮係開頭覺得新鮮不停聞個地下之外... 行都算行得快

而且好乖女地會跟住我哋腳踭行

不過如果我一個帶佢落去會唔放心.. 因為佢好堅持跟住我腳踭.. 變咗我睇唔到佢....

而且佢上落樓梯都比奶茶學得快同大膽

奶茶之夏水禮

17/5星期日, 風和日麗嘅天色, 難得奶皮爸又要知醒

我梗係唔會放過可以同奶茶去游水嘅好機會

正午十二點出門口... 我都知熱咗啲架啦~~~ 不過奶茶!!!! 有得玩值得架~~

經過上次行過去... 奶皮爸都係覺得行過去好啲...因為真係唔遠

但烈日當空... 我都行得辛苦啦... 奶茶點算... 我哋放棄用袋... 選擇行一陣抱一陣... 等佢做多啲運動 (其實我唔贊成咁做... 下次一定會袋佢去.... 我用手摸落個地都覺得辣肉... 奶茶仲要四隻腳喎 =.=)

行到一半... 梗係幫奶茶影下靚相...後尾先發現... 奶茶爸唔會自動自覺幫我同奶茶影相 =.=我玩咗成日都無合照過... 當然奶皮爸有好多合照我先咁講啦

嘿嘿~~~睇吓佢條脷幾長... 就知佢真係熱啦... 不過佢同時都好開心嘅

去到綠洲.... 未夠鐘下一輪喎... 唯有去草地行下... 我真係想奶茶跑吓草地

點知因為正午關係... 又真係幾曬... 奶茶郁都唔想郁...

咁啱隔離嚟咗隻見狗就吠嘅迷你牧羊

令到奶茶更加唔想行... 亦都唔敢行

嗰隻牧羊仲要同一隻迷你品打起上嚟... 奶皮爸即刻要我抱起奶茶上櫈

奶茶仲要嚇親添...

我都唔明啲人點解可以由得自己隻狗係咁吠人哋隻狗

長到會轉彎嘅脷呀!!!!!

見隻牧羊俾人綁住.... 奶皮爸就帶奶茶行一陣... 不過真係熱得滯... 奶茶都唔係好想行就自己行返嚟我腳邊

 

奶皮爸話: 小心熊出沒!!!!!

等到夠鐘就即行同奶茶去游水... (隻牧羊亦都因為我哋嘅離開亦都鬆咗繩)

奶皮媽我一心諗住奶茶第一次落水一定要拍片... 拍低佢架嘛...

點知一入去泳池... 入面已經有幾隻西施見到奶茶好開心咁一湧而上

嚇到奶茶個無膽鬼直接跳咗落水.... 仲要跳落深水區就游返去淺水區

我忍唔住讚佢叻仔, 但之後佢就唔係好鍾意游...

睇吓佢變咗落湯雞個樣啦....

其實佢真係算游得幾好... 第一次落水咋喎

不過上返水佢就唔係好肯落水... 周圍走周圍搵嘢玩

寧願同其他狗仔玩吓都唔落水... 不過隻史納莎好熱情... 係咁追住奶茶玩

我哋抱咗奶茶落水, 佢一支箭咁衝落水追奶茶... 嚇都奶茶嗌咗一聲

呢隻西施好叻架... 淡定到不得了... 游一個直池無問題

之後奶皮爸用埋嘢食氹奶茶落水都唔肯

同場加映... <<出水能游>>

玩完梗係要沖涼架啦.... 奶皮媽都係第一次用吹風機....

一開著奶茶即刻彈開... 奶皮媽同奶皮爸當然都俾吹風機啲聲嚇親....

不約而同咁話:"怪唔得之奶茶沖完涼返嚟會唔開心"

佢好似面臨大敵咁...有咁後企咁後

奶皮爸見吹返靚仔即刻幫佢影張相先

返到屋企都攰啦~~~~ 所以好快就瞓... 不過麥皮就唔知點解亦都好快瞓

到第二日起身... 奶皮媽見到呢個畫面一定要影底佢... 因為由頭到尾奶茶都無反抗麥皮咁做... 阿仔... 唔好做老婆奴呀!!!!!

不過一出咗籠... 奶茶就會係咁追住麥皮同佢玩... 打到佢反晒轉

所以奶皮爸話:"佢哋可能協意咗.... 喺屋企女人大... 出到去男人話事"

見返奶茶隻眼啦!!!~~

今日奶茶去咗沖涼, 因為想幫佢剪咗遮著眼仔嘅毛... 所以先送去寵物店(我想自己學識剪多啲)

因為之前第一次去係剷毛, 所以唔知原來沖涼都會剪頭

咁就開心晒啦~~~ 幾十蚊就做到我想要嘅嘢... 因為個身我覺得仲可以長啲先剪

大家嚟回顧下奶茶未剪毛個樣先啦~~~因為睇唔到隻眼咁滯架

呢張麥皮已經剪咗... 所以醒神過奶茶... 仲好似好精靈咁添... 不過唔知佢見到咩咁餵食呢

呢一幕係奶皮爸影底架... 因為佢哋越嚟越恩愛(唔打交嗰陣), 之前佢哋分開瞓架

剪完毛係咪醒神晒呢???

估吓佢哋搵緊咩.... (我唔知答案架)

我真係好鍾意麥皮佢笑到見牙唔見眼個樣