奶茶傷口進度

首先, 多謝咁多位擔心奶茶嘅朋友...

我今日帶過奶茶落街, 佢對其他狗都無特別抗拒, 依然好似以前咁八卦, 我終於可以放心

講返嗰日嘅情況,

嗰日, 我同奶皮爸都有責任... 無睇實奶茶,

準備入泳池時, 已經知道隻曲架有敵意不停發出"wu"聲

但無奈我哋都一人抱住一隻兼拎住其他物品

奶皮爸唯有放低奶茶開門,

當時曲架主人處理緊狗便便,

奶茶一見有新朋友就好踴躍行埋去打招呼

但曲架隨即放低原本咬住嘅玩具, 一口咬住奶茶個鼻

奶茶收驚向後縮, 即不停大嗌而且搵地方"喱"

全部我都俾奶皮爸遮晒睇唔到, 我只係睇到奶茶不停周圍走同嗌

我已經好驚, 初時以為奶茶俾對方嚇親

但一抱住奶茶時, 望到咀角嘅毛有血及右眼接近眼角位置直到鼻尖附近嘅一邊鼻樑都係傷口

綠洲職員同曲架主人都圍住我哋同拎咗急救用品

幸好, 奶茶俾我哋一抱住就已經冷靜落嚟, 我都忍住自己嘅眼淚不停同自己講"唔可以慌"

因為我知我嘅情緒會影響奶茶

非常多謝職員隨即幫奶茶處理傷口

而且亦肯退返游水嘅錢俾我哋

我哋抱住奶茶麥皮返屋企再去同奶茶睇醫生

醫生檢查完話好彩無傷到眼而且傷口唔深, 好快無事同埋唔會有疤

為方便清洗傷口&方便檢查清楚有無其他傷痕所以剷走咀仔啲毛

 

當晚, 上嚟屋企聚會嘅朋友都好關心奶茶嘅傷勢,

其實佢哋都問我點解唔追討醫藥費

喺發生事嗰一刻, 我根本無心情諗呢啲問題

更何況留低對方電話之類...

再者, 賠償醫藥費嘅一千幾百都唔能夠抵償已經被咬嘅事實

 

奶茶好叻好乖仔咁俾我洗咗兩日傷口, 已經結咗焦

所以我今日先帶佢落街

不過喺屋企都係要戴返頭罩以防佢再抓損

 

今日喺樓下撞到綠洲嘅職員, 佢好關心奶茶嘅傷勢仲同我講, 嗰日我塊面已經青晒, 所以都好擔心我

 

當日喺診所要等... 所以影咗張奶茶嘅靚仔相... 佢啲毛遮晒傷口, 剩係見到鼻樑有一點紅

 

當晚喺屋企, 戴住頭罩嘅奶茶確實係無心機

 

今日一散完步返到嚟未戴返頭罩不知幾生猛!!!~ 仲同麥皮爭玩具

宜家奶茶係一隻獅子王, 要等到星期六先會修修佢