12/11/2012 我只想身體健康

奶茶:

mami話佢好耐無update我哋近況
唔知啲blog友仔會唔會掛住我哋呢 
不過你哋唔好怪mami, 佢唔係懶, 只係我哋呢幾個禮拜都無去玩
而且mami讓電腦俾baba 打機, 都無機會執相
不過屋企已經添置多一部電腦, mami唔使同baba爭電腦都執到相架啦 
因為上個月仲有一次去街嘅相都未有時間去處理

今次mami要我話俾大家知, 我病咗, 所以先少咗出街呢 
話說由早排開始, 每次去開大時, 我都會嗌得好淒慘
當mami觀察咗一段時間, 而且將我去開大時嘅片段拍低
先去探下我好喜歡嘅肥醫生

但今次肥醫生聽完mami講, 睇完片, 連掂都無咩點掂過我
就話如有需要, 最好去照內窺鏡, 去睇下肛門&大腸有無咩異常
但肥醫生診所無呢樣設備, 所以嗌mami帶我去搵一間有呢樣設備嘅診所睇會好啲
如需要佢觸診檢查, 佢都只係目測一個手指嘅長度, 而我需要全身麻醉佢先會做呢個檢查
咁mami心諗, 如果係都要全身麻醉, 咁梗係照內窺鏡感覺全面啲
於是問肥醫生去邊度有得照, 肥醫生講咗屯門元朗各一間都有得照
但嗌mami記得問清楚護士邊個vet對呢個儀器比較熟悉 
聽完肥醫生咁講, mami仲擔心, 因為兩間診所mami都覺得唔可信的
而且聽肥醫生語氣, 即係佢唔會轉介/推薦任何一個
於是mami唯有自己搵
而肥醫生就開咗啲軟便劑俾mami, 等我試下會唔會去得無咁辛苦
仲提醒mami, 必要時要灌我飲水

於是mami就開始搵內窺鏡診所
自己上網搵人哋推介, 先發現, 原來好少照過內窺鏡經驗嘅分享
最後mami選擇咗一個非牟利機構嘅診所
喺灣仔嘅會有內窺鏡檢查
電話查詢後, 職員表示要約見一次醫生先可以照

之後mami同baba就帶埋我同妹妹一齊出去
今次見嘅係一個靚姐姐醫生
靚姐姐聽完mami大約嘅講解後
不停問mami, 我有無跌親過
然後檢查我膝頭哥同hip, 都話狀態very good
之後就開始喺我背脊每節好大力咁扣落去
扣到其中一節時, 我嗌得好大聲
於是靚姐姐表示, 我有可能係脊椎勞損
但未算好嚴重, 所以平常活動都無問題
只係開大時用力就會痛
而推斷應該因為我平時經常雙腳企喺度八卦
所以提示mami我要絕對嘅休養, 唔可以跳, 唔可以行樓梯/斜路, 高難度嘅指令(e.g.請請, roll)
亦唔可以放繩跑, 行山等
而開咗脊骨嘅止痛藥俾我, 一個星期後覆診 (但奇怪地靚姐姐放大假, 變相覆診一定要約第二個醫生)
無好轉就需要照x-ray
靚姐姐仲有觸診檢查我個肛門表示無異物因為預約時職員有問過mami, 我之前睇開嘅醫生電話同覆診號
方便向肥醫生拎我嘅病歷
但靚姐姐竟然話, 病歷只顯示我上一次睇醫生係打針 
肥醫生竟然連我上次探佢都無記底 

返到屋企, baba就話要將梳化收監 
唔准我再跳上跳落,


期間我多次唔記得咗梳化坐緊監, 想跳但撞咗落啲欄度
而且baba mami仲要我戒咗成日雙腳企喺度, 我宜家一企就俾人stop架啦
到第二次覆診前兩日
baba先知自己放唔到假
mami 好怕自己一個面對同我睇醫生而需要做一啲醫療上嘅抉擇
幸好搵到一個好ee陪mami一齊去咋
但因為上次我睇醫生時大嗌, 嚇到麥皮勁鬧醫生
mami唔想麥皮再嚇親, 於是就留麥皮一個看屋
其實麥皮三年幾以嚟都未試過一個看屋, 每次打針睇醫生我哋都行孖咇
出門口前mami俾咗舊骨骨佢咬... 但麥皮見到我哋要出去, 連骨骨都放低要跟我哋出去 


今次見嘅係一個外籍姐姐
基本上mami好似睇多個新醫生一樣, 要將我情況從新交代一次
而外籍姐姐亦有幫我做檢查
包括我個肛門及肛門線, 肛門內無瘜內之類異物, 肛門線亦暢通的
mami話覺得外籍姐姐溫柔過靚姐姐
因為我反應無上次咁大 (上次靚姐姐幫我檢查肛門時有大嗌, 而靚姐姐無檢查肛門線)
而開始檢查脊骨時, 好似baba mami幫我按摩咁逐節按壓
我無好似上次咁大嗌
外籍姐姐再將我兩後腳提起向後拉, 再向前推
然後再話放我落地行幾步俾佢睇下
有得落地我梗係開心啦~ 即刻周圍彈周圍八... 彈完去mami度, 再彈去醫生度
外籍姐姐都講咗句我係happy boy~
完全睇唔到我行路有問題, 所以脊骨係無問題的
而因為我大便習慣同飲水唔夠嘅關係
所以導致大便過硬而令到我大便痛苦
醫生表示, 肛門係有好多軟組織架
因為x-ray都要全身麻醉, 所以唔建議做並且仲要排期預約
於是佢提議mami可以試下幫我全面轉晒濕糧, 等我可以吸收足夠水份
每日兩餐, 晚餐可以再加一啲南瓜俾我,
再觀察可唔可以令排便容易啲, 不過已經唔需要覆診

由於mami知道如果要再預約照x-ray就需要睇多次醫生
所以堅持要醫生寫紙俾我照
然後再問下baba 意見, 而baba同ee都贊成可以試下醫生所講
如果都係問題繼續... 先再決定照x-ray都未遲

因為睇醫生, 所以mami專登去買一個我入到嘅狗袋, 以前屋企啲狗袋都係麥皮的
(1)

mami話我係傻瓜, 睇醫生都唔怕, 由頭到尾都咁開心
(2)

mami仲影咗張雙傻合照, 等工作中嘅baba可以放心
(3)

睇完醫生ee帶咗mami去食早餐... 唔熟路嘅mami知道原來診所附近有好多我可以去嘅餐廳, 下次可以同baba去附近食下嘢先走
(4)

(5)

因為外籍姐姐表示脊骨無受傷嘅關係
mami仲帶落喺樓下行咗一陣先返屋企
(6)

而呢幾日開始mami將我嘅糧浸濕先餵我
(本身mami有諗過買罐頭濕糧, 但好似未有一個牌子令佢特別有信心)
希望我會吸收足夠嘅水份
暫時好似未見成效, 因為我已經驚咗去廁所
宜家經常都係mami嗌我去先肯去
因為之前我怕痛唔敢去廁所關係, 結果一個惡性循環令便便更加硬
亦導致mami可以教我指令去廁所
宜家聽到"砵砵蕉"就知我要去廁所, 但我都要mami氹我一陣先肯去呢
mami同baba都希望我可以自動自覺去而且唔辛苦
而且, 希望今次外籍姐姐講嘅先係最正確 (因為唔希望係脊骨問題)

因為我嘅事, mami唔想咁快就寫落blog度
mami係一個有抉擇困難症嘅人
如果一件事聽到太多意見/提議, 會心煩亦唔識去選擇處理
所以mami一直都希望等我嘅情況有所定論
先再將佢紀錄低
所以呢段時間亦唔想寫blog
但放心, 我會好快無事, 咁mami就可以正常寫返blog架啦

另外呢個月嘅大發現係
麥皮唔知幾時開始, 突然個身變啡咗~
一直麥皮都唔係全白色, 而買返嚟時係想淺啡色的
不過之前都見佢白雪雪咁... 得背脊同耳仔有一行窄窄嘅啡色
而且綠茶bebe都白雪雪的, 仲以為麥皮應該都係白色為主
但奇怪地今個月突然啡了, 由麥皮多奶變做麥皮少奶 

另外多謝小火車ee, 喺呢幾個對mami艱難嘅幾星期
送上咗溫暖嘅小禮物