麥皮BB樣... 拜拜啦~~~~

買咗個電剪... 梗係要幫麥皮恤返個靚髮先啦...

雖然有少少唔捨得... 不過知道點都要剷... 因為麥皮底毛已經有兩截色... 仲要底嘅鬈... 面嘅直... 太古怪

不過係剷毛之前... 再睇返麥皮BB毛個樣先啦... 之後就唔係咁嘅樣架啦...

 

麥皮真係幾上鏡架.... 又唔怕鏡頭...

之後就再開始剃啦... 開始有啲雞手鴨腳... 又驚整親佢... 不過個剷真係幾好用... 一落刀就cher...一聲剃走咗

我初時仲好擔心自己一個搞唔掂... 要搵奶皮爸幫手... 不過原來我一個都搞得掂... 當然奶皮爸都有出過手架... 但我一個人都可以喎

個衰妹又唔係好驚個電剪咋喎

剷咗個身之後就放佢行一陣... 因為我覺得佢好搞笑...

呢度只係身一部份嘅毛

剷埋腳仔啲毛啦... 成個身瘦晒.. 可以去做瘦身代言人

拍埋奶茶度... 成隻細咗兩個碼

因為剷下玩下都搞咗四個鐘... 所以到第二朝起身先再剃埋個頭... 連個樣都唔同晒

 

順帶一提, 之後我順便幫奶茶修一修個身... 等佢唔好咁圓... 但pat pat啲毛好似修唔好咁...

仲有一樣開心事... 係我幫奶茶剪完毛之後沖涼... 竟然俾我喞到肛門線...

我好開心... 因為第一次喞到... 哈哈哈哈

 

剪毛

哈哈~~ 近期奶皮媽懶咗寫blog....

因為兩隻小寶貝好健康快樂成長中... 又無咩特別事...

今日七一紅假, 奶皮爸返夜朝早返嚟時... 帶咗兩個落街行

麥皮佢仲係對好多嘢都好新奇... 最好笑係佢仲驚緊啲影... 都行咗好幾次... 不過應該因為少日抖行 =.=

返到屋企, 望望吓奶茶... 覺得佢係時候要剪吓遮住眼仔啲毛

鉸剪都買咗好耐架啦... 只不過一直都唔係好敢剪...

今次都係奶皮爸落刀... 我負責捉住

 

好似好耐無up過佢哋嘅相出嚟... 所以睇吓呢排未剪之前個樣先啦

 

麥皮都幾乖女架... 任影唔嬲

奶茶要有嘢分佢心先影到佢最美一刻

不過係睇唔到眼仔咁滯

我一坐喺地下.... 佢哋會爭住坐上嚟.... 推嚟推去...

 

 

登登登.... 經過奶皮爸嘅神刀之後....

奶茶個樣即刻醒晒... 不過我哋諗住麥皮就剃毛... 所以係咁剪咗就算....

朝早行完街... 返嚟又剪毛... 平時日抖有得瞓架嘛... 唔玩啦... 我要瞓覺

幫奶茶剪完之後, 奶皮爸&媽個心都雄咗... 覺得麥皮我哋自己剷毛都無問題, 所以奶皮媽就決定去買個剷...

下晝, 奶皮媽就衝咗出街買電剪.... 因為我哋都唔鍾意用大陸牌子, 所以搵咗好幾間先搵到呢個美國牌子... 希望真係好用喇

哈... 行得街梗係要帶啲手信俾佢哋啦!!!

等奶皮爸返早... 夜晚有時間同奶皮媽一齊剷麥皮啲毛.... 超期待... 唔知會剪成點呢

麥皮打瘋狗症針

麥皮大個女啦.... 打晒針... 又拎埋狗牌...

可以去威威啦

尋日同麥皮去打針...

我諗麥皮應該唔鍾意佢個袋袋... 呢幾次出親去都無好嘢....

去到診所... 直頭縮埋喺個袋入面唔肯出嚟添

之後抱住佢見醫生... 醫生話佢不知幾健康... 仲好精靈添

不過麥皮點都唔肯企喺張枱度

佢上次打針無嗌過架... 不過今次就喺抆支針出嚟時嗌咗幾聲... 好淒涼

喺醫生度買埋心絲蟲藥... 麥皮食藥日期同奶茶好近... 可以夾埋一齊食

烈日當空... 一打完針行咗兩間pet shop

麥皮熱到下巴啲毛都濕晒...

一摸落去仲大大pat口水... 就嗱嗱聲返屋企...

中暑點算

今日聽到有兩隻金毛中暑... 咁就走咗

好唔開心... 點解咁熱仲去行山... 人都會中暑啦...

屯門狗公園

好開心呀~~~

屯門就嚟有狗公園啦...

希望快啲達成共識用邊度做狗公園啦~~

等奶茶麥皮都有得去玩吓識吓朋友仔~~~

唔使成日都要等奶皮爸放假先可以帶佢哋去游水個草地跑吓...

咁就可以做吓甩繩狗啦~~~

麥皮變喇叭妹

尋晚發現麥皮肚仔有個水泡, 所以今日就抱住佢去咗相熟嘅竉物美容店求救

之後美容店老闆娘一睇就話有膿喺入面...

不過佢話好少事... 整穿佢搽返啲藥膏應該無事

我記得見過奶茶lam過麥皮肚仔呢個位置... 所以要分房瞓啦

而且驚麥皮會lam走啲藥膏加返啲口水令佢個傷口繼續發炎

所以都係買個頭罩俾佢穩慎啲

返到屋企即刻幫麥皮上罩... 好明顯佢真係唔鍾意個罩

係咁向後行... 又撞嚟撞去撞個頭罩

仲要扭計添

無理佢隔咗一陣, 佢突然慘叫...

原來佢將隻手kick住咗喺頭罩度抆唔返出嚟

嚇得我呀

呢兩張都係整穿咗個泡泡搽咗藥膏

 

原本佢獲分配細房...

但諗吓諗吓佢好似好慘咁... 所以俾返間大房佢, 仲獎佢一舊牛皮骨... 之後無扭計啦

牛皮骨

我兩隻寶貝... 見到牛皮骨就開心架啦

特別奶茶, 一見到就唔到消滅佢都唔會停

個口可以唔停係咁咬咬咬咬... 最好笑係佢會咬甩一邊係咁嚼嚼嚼嚼... 好似食香口膠咁... 叫佢都係咬住咁望你

所以我同奶皮爸都叫呢啲做香口膠

早幾日俾咗一大一細嘅牛皮骨佢哋玩

麥皮個衰妹奶茶咬邊件就追住嗰件咬... 奶茶又好心地... 一俾麥皮搶咗就去搵第二舊

總之個口就唔停得

 

麥皮落得街啦

隔咗半個月先update blog... 因為奶皮媽嘅爸爸身體唔好... 所以奶皮媽無心情

不過宜家好啲啦

講返上個禮拜帶麥皮去打針先啦...

因為奶茶宜家有兩排牙仔... 奶皮媽擔心奶茶要脫牙仔... 所以就揹埋奶茶去見吓醫生啦

一個女人仔... 揹住三個袋... 因為驚麥皮打完針... 奶茶會整到佢個針口... 所以分開袋

都咪話唔論盡... 最重要係奶茶宜家成六磅幾七磅... 揹咗上膊都好攰

今次麥皮好叻... 竟然一聲都無嗌過... 以前奶茶打... 打完仲嗌緊... 十足十喺度鬧醫生咁

幾經辛苦終於揹返佢哋返屋企... 的士司機仲唔收我附加費添... 幾開心

初初我仲俾佢哋喺埋一齊玩... 但麥皮開始牛逗... 連奶茶撩佢玩都無反應

後尾就直頭奶茶過去掂一掂佢都扭計嗯咗幾聲...

所以要分咗佢哋... 困咗麥皮入返細籠... 不過佢都係瞓瞓瞓瞓...

到尋日... 奶皮爸同奶皮媽好開心咁終於可以帶兩個一齊落街又無落雨

比起奶茶第一次落街... 麥皮易帶好多

因為奶茶第一次落街時... 細膽得滯.. 聽到好多唔同嘅聲唔敢行...

行兩步就坐喺地... 你拖佢咩... 佢直頭扒喺地

一段五十米嘅路程行咗大半個鐘都未行完

但今次麥皮係開頭覺得新鮮不停聞個地下之外... 行都算行得快

而且好乖女地會跟住我哋腳踭行

不過如果我一個帶佢落去會唔放心.. 因為佢好堅持跟住我腳踭.. 變咗我睇唔到佢....

而且佢上落樓梯都比奶茶學得快同大膽