風和日麗之遊街去

星期日... 又雷暴警告又天陰陰(點會係風和日麗)令到原本計劃帶佢哋去游水都取消咗... 不過就落吓樓下行吓街啦

不過好彩天陰陰... 雨就未落得成但又唔會好熱... 又夠光俾我部傻瓜機影下兩隻小魔怪

有得落街兩個梗係開心啦, 未出發先興奮, 未出到門口已經開心到伸晒脷

因為無得去游水帶佢哋跑吓....我呢個大帝梗係開聲叫奶皮爸陪佢哋跑吓啦

順便可以影下奶茶嘅跑姿...

 

 

以下呢張題目是"男人與狗公"

麥皮喺度做咩... 佢好驚白色個石"膊"架... 但其實行人路多人時行石"膊"會方便啲...

所以我就引導(誘?)佢上去行... 等佢唔好驚嘛...

我屋企附近好在空地多... 雖然係馬路邊所以唔解繩... 但奶皮爸帶住佢哋跑下都好呀

奶茶跑到唔願停呀... 相反麥皮唔願跑.... 剩係慢慢行...

望咩望到咁實先??奶皮爸咁好望嘅咩

 

 

哈哈... 原來有水飲, 平時兩個落街唔係好飲水架... 但今日唔知係咪因為跑過... 搶住飲啲水... 飲到停唔到口

之後我哋仲去咗另一個會撞到好多狗街坊嘅空地...

見到三隻史納莎, 一隻哥基, 一隻芝娃娃, 一隻西施, 仲有唐狗

奶茶宜家見到狗都係會行埋去但人哋聞返佢就係咁縮... 麥皮直頭連郁都唔敢郁

要麥皮見多啲世面先得啦

不過之前一晚我哋落去分別見到兩隻poodle, 都係咁細膽喎... 有隻係淺啡色...佢主人話原本係奶茶咁嘅色... 但褪色褪到淺啡... 得個鼻附近仲有深啡....

原來一停咗美毛粉之後就開始褪... 仲要褪咗就算食返美毛粉都出唔返深色

各位養火紅poodle嘅老友, 小心呀~~~~~

 

 

行完街街返到屋企, 兩位小朋友已經好快瞓著覺... 我有位養咗五六年狗嘅朋友見到佢哋咁瞓仲好羡慕咁講... 佢兩隻小朋友已經無咁瞓好耐

特別麥皮好瞓到不得了... 到我哋餵佢哋開餐... 揸住個糧兜行到佢面前都仲瞓緊唔醒

好彩食飽又同奶茶玩過咋... 唔係就以為佢唔舒服架啦

麥皮BB樣... 拜拜啦~~~~

買咗個電剪... 梗係要幫麥皮恤返個靚髮先啦...

雖然有少少唔捨得... 不過知道點都要剷... 因為麥皮底毛已經有兩截色... 仲要底嘅鬈... 面嘅直... 太古怪

不過係剷毛之前... 再睇返麥皮BB毛個樣先啦... 之後就唔係咁嘅樣架啦...

 

麥皮真係幾上鏡架.... 又唔怕鏡頭...

之後就再開始剃啦... 開始有啲雞手鴨腳... 又驚整親佢... 不過個剷真係幾好用... 一落刀就cher...一聲剃走咗

我初時仲好擔心自己一個搞唔掂... 要搵奶皮爸幫手... 不過原來我一個都搞得掂... 當然奶皮爸都有出過手架... 但我一個人都可以喎

個衰妹又唔係好驚個電剪咋喎

剷咗個身之後就放佢行一陣... 因為我覺得佢好搞笑...

呢度只係身一部份嘅毛

剷埋腳仔啲毛啦... 成個身瘦晒.. 可以去做瘦身代言人

拍埋奶茶度... 成隻細咗兩個碼

因為剷下玩下都搞咗四個鐘... 所以到第二朝起身先再剃埋個頭... 連個樣都唔同晒

 

順帶一提, 之後我順便幫奶茶修一修個身... 等佢唔好咁圓... 但pat pat啲毛好似修唔好咁...

仲有一樣開心事... 係我幫奶茶剪完毛之後沖涼... 竟然俾我喞到肛門線...

我好開心... 因為第一次喞到... 哈哈哈哈

 

剪毛

哈哈~~ 近期奶皮媽懶咗寫blog....

因為兩隻小寶貝好健康快樂成長中... 又無咩特別事...

今日七一紅假, 奶皮爸返夜朝早返嚟時... 帶咗兩個落街行

麥皮佢仲係對好多嘢都好新奇... 最好笑係佢仲驚緊啲影... 都行咗好幾次... 不過應該因為少日抖行 =.=

返到屋企, 望望吓奶茶... 覺得佢係時候要剪吓遮住眼仔啲毛

鉸剪都買咗好耐架啦... 只不過一直都唔係好敢剪...

今次都係奶皮爸落刀... 我負責捉住

 

好似好耐無up過佢哋嘅相出嚟... 所以睇吓呢排未剪之前個樣先啦

 

麥皮都幾乖女架... 任影唔嬲

奶茶要有嘢分佢心先影到佢最美一刻

不過係睇唔到眼仔咁滯

我一坐喺地下.... 佢哋會爭住坐上嚟.... 推嚟推去...

 

 

登登登.... 經過奶皮爸嘅神刀之後....

奶茶個樣即刻醒晒... 不過我哋諗住麥皮就剃毛... 所以係咁剪咗就算....

朝早行完街... 返嚟又剪毛... 平時日抖有得瞓架嘛... 唔玩啦... 我要瞓覺

幫奶茶剪完之後, 奶皮爸&媽個心都雄咗... 覺得麥皮我哋自己剷毛都無問題, 所以奶皮媽就決定去買個剷...

下晝, 奶皮媽就衝咗出街買電剪.... 因為我哋都唔鍾意用大陸牌子, 所以搵咗好幾間先搵到呢個美國牌子... 希望真係好用喇

哈... 行得街梗係要帶啲手信俾佢哋啦!!!

等奶皮爸返早... 夜晚有時間同奶皮媽一齊剷麥皮啲毛.... 超期待... 唔知會剪成點呢