奶茶:
咁啱妹妹做手術嗰日, 就係你嚟到我身邊嘅日子剛好一年
諗起一年前嘅21/11 你仲係一個bb咁... 腳仔短短... 行路論論盡盡
喺pet shop... 就係因為你嘅論盡... 令我鍾意咗你
好記得... 你初初嚟時... 連個籠都要爬先入到去... 到宜家跳出跳入無難度
第一次自己照顧一隻狗狗... 由教禮儀到指令... 每一樣我都好俾心機教
幸好嘅係你一直以嚟你都健健康康... 無咩病通... 希望你一直都健健康康啦
或者宜家嘅你有啲曳有啲敏感... 但喺baba mama眼中都係至愛至錫嘅仔仔
不過麥皮分薄咗少少喇
愛你嘅mama上
兩個月嘅奶茶
冬天要著衫仔架...
以前奶茶個樣幾鬼嗲
小朋友真係大得好快架
四個月時已經大咗好多咁
宜家都好少咁嗲mama咯...
五個月未剃毛時成隻肥嘟嘟咁
哈哈~ 呢張係我第一張影到咁動感嘅奶茶
剃咗毛個樣即刻輕盈晒
唔覺唔覺已經半歲咯
haha~奶茶個鼻鼻仲好黑呀
第一次見妹妹打下招呼先啦
啲毛長到遮晒眼仔
有得去玩嘅奶茶特別醒神
妹妹真係好鍾意痴住哥哥
奶茶一歲生日
換咗造型
依然識到女朋友
麥皮呢兩日喺屋企除咗不停"un...."~ 好可憐咁
仲要坐唔安瞓唔樂... 我諗佢傷口真係好痛
佢第一晚返到屋企半夜開始, 我諗麻醉藥過咗... 因為佢坐坐下會突然彈起不停轉同好想舔傷口
成晚我唔捨得瞓睇住佢... 佢"un..."咗一晚同四腳掂地企咗一晚
我抱住佢先瞓到一陣... 不過都係會突然彈起係咁轉
到第二日都係咁.... 我見到佢好攰咁但又唔敢扒喺地瞓
淨係企喺度釣魚~ 抱住佢喺梳化瞓咗一陣係瞓得最熟
我想問佢仲會痛幾耐...
今日, 係麥皮絕育嘅日子
一直都睇開呢個醫生都唔錯
但今日嘅安排令我覺得不忿
我約十點, 十點去到診所坐咗幾個字都無人... 之後清潔出嚟...
話姑娘餵緊藥, 等咗半個鐘個姑娘出嚟登記咗俾埋錢, 我話如果醫生未得閒我可以陪下麥皮等, 我唔想佢一個喺入面等 (因為姑娘出嚟前嚟咗個無預約睇貓)
我同麥皮坐喺度等咗一個鐘, 之前嘅睇貓走之後又嚟多一個睇貓嘅
等咗個半鐘, 兩個睇貓嘅都走晒之後, 我問姑娘得未, 佢先話得...
奶皮ba問我... 咁做咩要預約, 如果成日都有人行入嚟無預約咁係咪等佢睇晒先
我無咁諗, 只係諗... 好彩我陪住麥皮, 唔係麥皮一個等個幾鐘實嚇死佢
我走嘅時候係十二點, 姑娘話要等埋麻醉藥散... 應該五點度得, 醒咗會打俾我
之後我喺屋企等到四點半, 打去診所問麥皮走得未
佢答我"係呀, 麥皮走得啦"
我唔明點解要我打去問先知
麥皮返咗嚟之後, 佢麻醉藥都散咗好多... 肯郁下, 不過因為戴住頭罩同仲有少少唔舒服
不停發出扭計嘅聲音... 我諗佢瞓得唔舒服... 因為佢扭計時都無瞓/坐喺地
聽到心都噏埋
奶茶個八卦仔好想去同麥皮玩... 不過要隔開, 我哋又成日睇住麥皮
變咗到佢扭玩
喺的士上仲未知自己將會發生大事嘅麥皮
入到診所都知唔對路... 突然變得好鍾意個出街袋好想入返去
其實我有影過佢個傷口... 不過好似好肉酸咁... 留返啲啲私隱俾我個囡囡喇
今次麥皮威啦~ 分配到一間房, 成間房都係佢架喇
轉季喇轉季喇~
其實... 奶皮ba同奶皮ma都唔贊成小朋友需要著衫架
所以一直都好少買衫俾佢哋
不過天氣一轉涼時, 發現麥皮都幾怕凍
所以就決定買返幾件衫仔俾佢著
點知一去淘寶.... 就上咗癮咁=.=
呢兩件運動裝係我最鍾意嘅一套
質地好舒服而且好fit... 不過件衫要過頭笠, 兩個大頭仔都著得有啲難度
今日我仲醒起原來自己都有一套絲絨運動裝同奶茶嗰套差唔多樣
跟住落嚟嘅模特兒以麥皮為主... 唔係因為我偏心... 係奶茶真係好唔鍾意著衫... 唔會俾我影相
買咗件雨褸... 落雨都可以落街玩喇... (呢件奶茶都有架)
原本睇到嗰件係粉藍色, 不過無貨諗住黃色都唔係好緊要啫
但出嚟好似細個著嗰啲雨褸咁... 仲有"FBI"... 幾有型~ 哈哈哈
呢套係一轉涼就即上網買嘅... 覺得都幾得意, 麥皮著咗即刻成個男仔咁
買到起咗癮嘅我, 已經諗定過年著咩好喇
所以買咗條唐裝裙仔俾麥皮, 西裝俾奶茶... 兩個都好搞笑
奶茶即時變咗一個紳士...HAHAHAHAHAHAHAHA
呢條格仔裙好耐之前買落都未影, 即係上次去珀麗灣嗰條
呢條係番茄媽送俾麥皮嘅, 好保暖同好靚~多謝你呀~番茄媽!!!
呢條粉紅褲仔又係番茄媽送, 仲諗定新年有個袋仔逗利是添呀...
