東京大阪之旅 day 4 下

喺離開富士急時, 行去出口沿途都會見到有關一間喺樂園附近嘅溫泉嘅廣告板, 啲廣告都設計得幾好笑

呢個廣告最吸引我之處係佢2051年登場嘅過山車係人手拉... =.=

離開富士急, 我地就開始向位於富士山腳嘅酒店前進, 越近我地要轉車嘅地點, 亦都開始感覺得車外嘅氣溫轉變, 霧氣越來越勁, (好似呢幾日香港我返親屯門都見到巴士啲霧氣越來越多), 如果我無記錯... 當時有路牌寫住2度...

轉車再上山就到達我哋住嘅溫泉酒店, 而且仲係榻榻咪房... 間酒店其實有普通酒店房... 但有一層全曾都係榻榻咪... 可以因為設計比較舊式... 所以佢暖氣唔會好似普通酒店咁有中央暖氣, 會有一個暖氣爐, 就喺電視機後面嗰個, 如果坐得近窗, 都幾凍... 另外無雪櫃, 導遊話要雪嘢就將要雪嘅飲品放出窗, 又真係得喎...仲有就係佢個洗手間奇細, 可能預你地啲人去浸溫泉唔會喺房沖涼, 沐浴露洗頭水一律不會提供, 要沖就要去浸溫泉度沖... (逼人浸 =.=) 原本我唔想浸都變要去浸... 專登去沖完涼就走就係傻仔... 

一出房就望到呢個窗嘅裂痕... 證明呢間酒店都飽歷風霜...

安頓好之後就享用晚餐喇, 今餐係火煱加自費嘅刺身船, 我仲另外加多個海膽添, 原來日本嘅刺身係咁好味, 同香港嘅真係無得比, 滿滿嘅刺身船已經令我夠飽, 但竟然俾我知道佢有煲咗紅豆湯... 又點可以放過呢

 

東京大阪之旅 day 4 上

到我哋10/1/08 第四日嘅行程喇, 一出酒店佢就有一個郵筒, 好奇嘅我當然要影返張喇, 呢間溫泉酒店服務好好... 因為佢哋嘅經理級人員會出嚟送行, 仲要揮手直到我哋間車離開酒店

由於我哋今晚嘅酒店位置唔係旅遊巴可以到達嘅, 要轉搭小巴, 所以導遊前一晚已經叮囑我哋要執定多一晚嘅行李, 因為大型行李係唔會去今晚嘅酒店, 喺旅程途中搵喼拎嘢亦都比較麻煩...

我哋開始向富士山嘅方向前進, 因為我哋第五日就會去到富士山腳, 越嚟越接近富士山, 而溫度亦都越嚟越低...

第四日, 第一站就係會去御殿場outlet, 佢係一個好大地方嘅outlet 專區, 好多品牌都會喺嗰度開outlet專門店, 令我最有興趣嘅係nike, 但入面嘅款或者價錢都唔吸引我, 所以都係無收獲... 嚟咗日本三日都買唔到嘢乜滯... =.=

去完outlet, 我哋就去富士急樂園, 佢係一個以三個過山車為主要嘅樂園 (其實係因為除咗三個過山車其他都勾唔起我興趣), 而佢每個機動遊戲都要自費逐個俾錢... 而過山車要JPY1000 (HK70) 一個, 但佢有隻PASS 係JPY2000 玩三個, 我當然要三個都玩齊喇!! 因為四日行程, 呢一日令我係最有興趣架喇... (因為我對買嘢真係麻麻地) 而團中亦都得我一個女仔要買三次PASS... 最開心嘅係張PASS 上面會有1,2,3 , 每玩一次就會打一個窿, 當我哋玩到第三個時, 工作人員無幫我哋打窿亦都收返張飛... 所以我哋膽粗粗就拎張飛去玩多一次另一個... 結果我地JPY2000 玩咗四次過山車... 哈哈

第一個令我即刻衝去要玩嘅就係呢一個, 你睇到佢坐位嘅設計, 就知道佢係釣住對腳玩, 所以我玩之前都除咗對鞋先玩... 驚對鞋咗出去... 而且佢個坐位係會360度自轉, 所以當佢上斜嘅時候, 係背住上等你唔知幾時到, 到垂直衝時, 你係會面向地下... 離心力或者衝力都係一絕... 當然... 我三個之中玩多一次嘅就係呢個, 我會好記得一上到個位, 架車都未開我已經開始緊張同手心出汗嘅感覺... 好彩當日唔多人, 所以唔使點排隊.... 如果唔係導遊都話驚我哋玩唔晒...

第二個玩嘅就係呢個歷時三分幾鐘嘅過山車, 其實我一到富士急時最無興趣就係呢個過山車, 但玩完之後嘅觀感唔同咗... 佢坐位設計係只會欄腰... 因為佢唔會轉大圈, 但就係因為佢淨係欄腰, 所以係玩嘅過程你會覺得膊頭好唔安全, 上半身可以周圍郁... 個人好似隨時會掉出車... 而且佢會上到七十幾米八十米高之後再(腑)衝... 令到你覺得個人好似會跌會跌咁.... 好刺激...

最後一個我無乜點影啲路軌係因為佢路程唔算好長... 但佢刺激之處在於車速會去到百幾公里... 你嘅面會感受到風嘅速度... (哈哈... 雖然老套... 但係真架喎), 當然佢嘅百幾公里只係會感受一條直路之後就會開始減速... 我估係緩衝返個速度所以會行一陣過山車嘅路先會完, 過山車路比起前面個啲會遜色少少, 但都唔差嘅... 而且個速度感真係一絕...

樂園入面有一架貨車停喺度, 應該係俾人影相啩... 因為佢好似暴走族嘅車咁

喺樂園入面好清楚咁睇到富士山...

到六點, 由於唔係旺季, 所以樂園就會收... 我地亦都係呢個時間集合喇

東京大阪之旅 day 3 下

去完清水寺之後去嘅就伊勢丹百貨公司, 哈哈... 我都以為有收獲嘅時候... 結果都係無收獲... 最大收獲嘅係知道手塚治虫館原來係只係一間商店... 雖然佢都有一啲手稿喺度... 不過大多數都係紀念品... 好似入咗Trendy land 咁... 買咗一件好靚嘅男裝長袖衫... 三百幾蚊左右...

去完伊勢丹, 我哋係約好咗集合時間搭子彈火車, 但竟然有團友盪失路遲到... 但奇就奇在原本係三個妹妹仔, 但有一個返咗嚟... 有兩個盪失路... 真係盪失路定買嘢買遲咗? 就不得而知喇... 但就嚇親我哋個導遊喇... 因為我地搭嘅子彈火車只係會搭一個站... 剛好呢個會逐個站停嘅就一個鐘先有一班... 所以如果我哋趕唔到搭呢班車就要等一個鐘... 當然最後都趕得切... 不過我哋就趕啲囉... 要半行半走...

其實日本搭車都幾貴, 好似今次子彈火車一個站都要JDY385 即係都成廿幾三十蚊... 上次無人駕駛都要JDY240即係大約十幾蚊... 而我哋嘅導遊亦都話我哋今次呢七日上嘅公路隧道費都要成幾千蚊... 咁究竟我今次跟團算抵咗?

聽導遊講, 子彈火車可以行到二百幾km一小時... 所以由京都去米原原本要幾十公里嘅路我地用咗三個字就到達.... 落咗車架車仲會停俾我地影相... 車長又會出嚟同我地影相... 不過我無同車長影.. 因為我覺得佢好慘... 而且架車其實仲有其他乘客無落車... 佢哋要等我哋影晒相架車先會開走.... 喺車站等時, 中間有兩條唔停站嘅路軌... 當有唔停站嘅車經過時, 我就感受到之前喺車廂中感受唔到嘅二百幾km...

由米原我地會上返旅遊車, 之後就係去第三晚嘅溫泉酒店, 返房換上日式浴袍之後, 就享用我第一次食嘅懷石料理.... 如果人地俾幾千蚊食一餐嘅懷石料理都係咁嘅話我以後都唔會食... 好記得dj阿芝講嘅洗死人嘅一餐飯... 我今次都係除咗呢個感覺之後就無其他感覺喇... (都係自己俾錢嘅好味)

席中有一位九歲嘅小妹妹, 同媽媽兩個去旅行, 由於團中再無其他細過十歲嘅小朋友, 所以團友們都對佢愛護有加, 而呢位小妹妹絕對都係嬌生慣養, 對住一枱嘅懷石料理, 就續樣用筷子指話:"我呢樣唔食, 嗰樣唔食, 樣樣都唔食, 即係我無嘢食... 會好肚餓架喎" 呢位小朋友果然坦率... 但佢應該嚟錯日本, 牛肉唔食, 海鮮唔食... 仲有咩可以食...

橙色碗嗰一啲物體我有食... 但我真係食唔出係咩... 而隻蝦.............

個餐令我最回味係啲洋蔥... 哈哈哈...

食完晚飯, 就可以去浸酒店免費提供嘅溫泉, 尤於我係第一次去呢種要脫清光嘅溫泉, 所以我等到十一點, 覺得啲團友都應該差唔多浸完先去, 雖然導遊都講明, 酒店俾我地圍巾去浸, 但其實除衫吹頭放低所有物品都係一間大房內進行... 所以我入去時見到仲有其他人喺度, 有人會脫光行嚟行去... 都幾尷尬... 而酒店亦都會提供一條大浴巾都細毛巾俾你, 我見到日本人係用細毛巾(好似面巾咁上下大) 浸, 怕羞嘅我當然圍住諗住大浴巾浸喇... 浸之前要沖咗涼先可以浸... 我圍住條大浴巾坐住喺櫈仔... 一沖水就即刻後悔喇... 因為我諗緊用咩嚟抹身呢.... =.=