我好鍾意帶奶茶落街時, 記住佢遇過每一隻狗, 當時奶茶反應同嗰隻狗嘅反應,講返俾奶皮爸知
好似今日咁, 我帶完奶茶行, 奶皮爸收工過嚟接我同奶茶, 我哋去買pizza
等pizza期間, 我走開咗去買嘢, 返嚟見到有一對男女同一架裝住兩隻狗狗嘅車仔, 女主人同奶茶講緊嘢, 仲喺架車仔度拎咗條肉條俾奶茶, 奶茶當然開心啦, 但我會諗"亂咁食人哋俾嘅嘢好唔好架.... "
餵完之後, 女仕好鍾意奶茶, 係咁逗奶茶玩, 仲話要抱佢返屋企添
其實佢咁鍾意奶茶, 因為奶茶唔怕生保人, 又貪玩百厭夠活潑嘛... 而佢兩隻狗狗都十五歲, 所以好淡定... 佢仲話宜家兩隻狗狗都唔願食嘢, 睇見奶茶食得咁開心都覺得開心
之後奶皮爸講返我知, 原來係佢哋停定咗睇奶茶時, 奶茶八八卦卦企咗喺度擒住架車仔聞人哋啲狗狗, 點知狗狗就作勢要咬佢, 女主人知道嚇親奶茶所以要請佢食嘢
食完第一條仲遞多一條俾奶茶, 奶茶梗係開心啦, 但點可以食咁多架, 所以第二條俾奶皮爸即時收起咗
個八卦仔咁就賺咗兩條肉條
衰仔有街去個樣就開心晒架啦
自從奶茶同麥皮同居之後, 我發現麥皮好鍾意瞓廁所, 但個衰女未打齊針唔沖得涼, 搞到成身都有陣尿酥味, 都幾頭痛
但今日竟然俾我發現到方法令麥皮唔瞓廁所, 就係開咗廁所嗰邊嘅籠頂
話說我哋經常都係開瞓覺嗰邊籠頂嘅, 因為佢哋有啲咩要執都唔怕因為我哋開廁所嗰邊搞到佢哋都行埋過嚟踩到成腳係
今日, 因為奶皮媽我餵完第一餐之後仲好眼瞓, 所以瞓喺廳度開住廁所邊籠頂睇佢哋, 到我再瞓醒時, 奶茶麥皮竟然瞓埋同一邊(平時佢哋一個瞓一邊, 奶茶就一定瞓無廁所嗰邊)
今日唔知點解夜晚同佢哋兩隻嘢玩時, 麥皮笑得好開心, 佢嚟到之後好少笑得咁開心, 搞到我都好開心, 奶茶又跟住笑喎
仲有, 俾我發現奶茶有風度嘅一幕, 話說麥皮玩緊個波時, 個皮kick住咗喺籠底, 未入去,
奶茶原本攤咗喺地抖緊涼(啱啱落完街), 起身去撩個波, 我以為佢又要同麥皮爭嘢玩, 見到麥皮玩所以要玩, 點知佢撩完咬住放行去一個好中間嘅地方放低就行開去
之後麥皮就好開心咁繼續玩波, 好好笑地次次佢見到個波想玩都會跳下跳下個屁股扭下扭下咁行過去
奶茶好鍾意呢舊牙膠, 但其實我係買俾麥皮架... (不過麥皮都鍾意咬奶茶原本嗰舊 =.=)
呢張麥皮個樣實在太好笑, 所以一定要俾大家睇吓
佢哋每一有一舊牙膠時係好和平架
但到公仔只得一個, 所以佢哋都喺度扯, 其實佢哋都係玩緊啫, 奶茶會邀請我一齊玩架, 我諗因為麥皮都唔夠佢嚟, 次次都贏唔開心啩
因為嗰日麥皮打完針... 成隻乖晒~~哈哈哈