星期日, 難得baba有假放, 梗係要去玩架啦
去得草地多... 一見入秋~ 就想去行下山
於是就喺屯門行山啦~
上網搵咗資料, 知道屯門徑短短地~ 小試牛刀, 就一於去屯門徑試下啦
不過由屯門市中心後面上山, 淨係行樓梯已經行到成身大汗
最c服就係麥皮, 因為一上斜同樓梯就有特等位坐, 齋睇風景
不過屯門徑都有啲難度, 因為路比較窄, 樓梯多... 所以我哋都無放過繩
行到若夢園, 分叉路上我哋揀錯路, 結果行完第一段就落咗山,
沿途落樓梯時經過一列鐵絲網, 入面仲困住幾隻大狗
一見奶茶麥皮就激烈狂吠... 連我都有啲驚, 因為有隻喺我身邊突然撲上鐵絲網...
一方面唔敢望實佢哋惹佢哋之外, 又要裝下鐵絲網會唔會有窿俾佢哋捐出嚟
落咗山先發現我哋只係行咗個零鐘, 奶茶仲係一副未放晒電嘅樣
於是我哋索性行多大半個鍾行返屋企
再喺屋企樓下跑下
返到屋企, 兩隻小豬就攰到係咁瞓lu
第一段分叉路是選擇屯門徑/或者麥理浩徑, 我哋今次揀咗屯門徑, 下次揀麥理浩徑
如果去麥理浩徑就會進入大欖郊野公園範圍
若夢園, 唔知呢度以前係咩嚟嘅呢, 好多佛像排晒喺度俾人裝香 (我唔敢影神佛像)
行到一半時居高臨下遠觀屯門
今日奶茶仔好上鏡呀
麥皮妹妹都唔弱, 不過今次哥哥靚啲
麥皮好鍾意飲完水之後係咁聞地, 幫政府抹下地, 服務大眾
準備上山時, 佢哋已經好期待啦
上到半山, 兩兄妹梗係要影下合照先啦
話咁快落山啦, 睇佢哋個樣就知唔夠皮啦
於是喺樓下放奶茶仔跑下, 順便練下"come"呢個指令
