29/9/2012 大棠燒烤齊迎月

奶茶:

mami話等咗兩個幾月, 終於有個long long weekend

而且天氣開始涼... 唔使怕我同妹妹出街會熱到暈可以放心去玩

星期六迎月夜, mami就約咗朋友去大棠燒烤

不過嗰日個個哥哥姐姐ee uncle都要返工

得mami同一個肥哥哥去買嘢食洗嘢

之後再去霸爐都已經搞到五點幾

好彩mami都話帶我哋去跑下... 咁就影咗少少相

但mami話我太紮紮跳... 唔夠光之下影嘅都濛晒

反而妹妹好定咁擺pose喎  我先唔鍾影相呢

呢日啲小朋友見到我周圍跑都忍唔住追住我

其實追住我都唔緊要... 但中秋時份係咪會特別多武器嘅呢 

有個妹妹拎住佢碌軟身嘅大碌發光體... 諗住劈埋嚟

嚇到mami大喝妹妹一聲... 好彩妹妹都知驚

佢梗係發現我mami其實好得人驚呢 


mami見到大奶茶個兔仔燈籠, 忍唔住要去買返個  我又唔玩得又唔食得... 嘥錢
(1)

(2)

(3)

(4)

(5)

(6)

(7)

(8)

(9)

(10)

(11)



(12)

(13)


我哋等到九點baba佢哋先至到咋~ mami話佢好彩帶咗我哋同佢仲有劇煲呢

不過見baba有買麵包同牛扒俾我哋食, 就原諒佢啦 

26/9/2012 自家美容回顧

Kit:

其實初初無自己親力親為嘅想法

記得嗰時奶茶幾個月大, 覺得奶茶腳底毛有啲長

落咗樓下狗舖買咗一個小剷, 

小心奕奕咁將奶茶嘅腳板底毛剷清

望到清楚嘅腳板底,

嗰刻嘅成功感真係好大

大到我覺得自己好似做咗一個壯舉

之後到麥皮需要剃bb毛時

我亦去買咗一個覺得幾貴嘅剷 (6XX)

自己落刀幫麥皮全剷

嗰種滿足感足以令我開始想自己落手落腳

養奶茶頭兩年, 曾經一度認為奶茶係好憎我

嗌佢唔會俾我抱, 想抱佢好似捉佢咁

摸下手腳都會wu我咬我, 更莫講梳毛時, 咬得更加出力

喝罵打鬧, 連clicker獎勵都試過

但同樣都係咁出力咁抗拒我

曾經一度... 俾奶茶咬到我除咗抱住佢停手唔梳... 眼淚不停流之外

好似咩都做唔到

baba唔止一次同奶茶講"全屋連妹妹都蝦你, 最錫你嘅得mami架咋... 你唔好蝦佢啦"

我都忍唔住眼濕... 

嗰時亦開始baba要擔起幫奶茶梳毛嘅責任

回想返轉頭, 奶茶變成咁, 我係最大責任嗰個

因為初初養奶茶... 覺得人哋留喇叭腳好靚, 所以就跟住要奶茶留喇叭腳

但唔識梳毛嘅我, 每次都無梳清長長喇叭腳嘅結

只會令佢迅速結成一個個毛餅

對奶茶嚟講... 梳毛絕對係一件苦差

當第一次搵姐姐上門美容時

我先知道正確嘅梳毛方法

亦明白奶茶一直以嚟嘅痛苦

但嗰種痛對奶茶嚟講已經根深柢固

由嗰時開始, 就不停搜羅一啲關於貴婦嘅美容資訊

日文書中文書都買, 買到有朋友問我係咪會轉行 

(有啲人梗係會認為有興趣嘅事就應該變做職業)

間中就幫奶茶麥皮修眼仔附近嘅毛

麥皮一直都細膽, 最抗拒係抆耳毛同剷肚毛 (從來麥皮嘅字典無"做多啲就習慣"呢類句子, 由細個見到嘢食就唱歌, 到見到狗朋友都係縮埋一邊呢類情況證明一切)

連上門美容嘅姐姐都搞佢唔掂

我會擔心, 落到狗舖, 我睇唔到時會點呢

有次奶茶去一間經朋友介紹的美容店 (唔係第一次去)

接返嚟時竟不停抖震

從此我就搵姐姐上門美容

其實上門姐姐手勢好好

奶茶麥皮都好歡喜姐姐

只係剛好我開始想搵一啲寵物美容嘅課程

而剛好賣麥皮俾我嘅人開興趣班教人剪貴婦

於是就報名, 亦開始我自家美容嘅生活

不經不覺就剪咗接近兩年

兩年嚟, 其實我都唔能夠可以獨立完成奶茶嘅美容

包括嘅係, 剪甲腳底毛清肛門

但奶茶已經肯俾我梳毛而唔再咬我係令我最欣慰

以前, 每次美容完成都寫一篇blog

只係單純想幫奶茶麥皮去做一個紀錄, 亦印證住我剪法嘅改變

甚至宜家睇返初初嘅美容blog

都知自己有好多不足, 有啲直頭連自己都怪自己剪到對仔女個樣咁怪

慢慢我亦唔想每次都刻意開一篇blog

因為我都唔會有咩新意

炒冷飯時間啦~ 睇返啲舊相先呢個就係我第一次剷毛呢
(1)

呢個係上完四堂喺老師指導下剪嘅麥皮 (不過瞓扁咗)
(2)

嚟緊開始出現嘅怪樣奶茶同怪樣麥皮
(3)

(4)


(5)

(6)



(7)

(8)
 

(9)

(10)


我覺得麥皮呢個裝好熟女, 唔襯佢咁傻妹呢
(11)

(12)

(13)

(14)

到呢度之前,我嘅問題都係將頭頂啲毛剪得太低
(15)

(16)

(17)

(18)

(19)

(20)

奶茶嘅頭盔頭終於出到初型
(21)

其實中間都有剪毛, 但已經無寫blog, 所以無相影低呢
(22)

(23)

奶茶仔, 四歲生日快樂 ^3^

Kit:

奶茶仔, 估唔到咁快就四歲啦

一到生日嘅月份, 就會不停諗起買你時候嘅畫面

諗起三年零十個月前嘅一晚,

經過我幾星期深思熟慮(但無做research)而作出嘅養狗決定,

傻更更咁行去勝利道嘅是但一間狗舖

你唔係特別靜, 你同一眾狗bb一樣以為有人行過就有嘢食咁

會不停跳, 當時我唔係第一眼就睇中你,

坦白講, 我眼中你哋所有bb都好似一樣樣咁,

之後店員好有耐性咁將籠內嘅bb逐隻抱出, 

其中就見到你, 因為你嘅毛色比其他較淺少少, 所以已經覺得你會係特別嗰個

之後店員仲話我可以試下放你落地, 跟住又話你好跟我

(後尾我醒覺呢個係手法, 通常bb都跟人, 特別啱啱抱出籠)

傻更更嘅兩個人, 就決定咗要接你返屋企啦

當然啦, 無做過research 嘅我哋, 被遊說買咗好多唔重要嘅補給品日用品之類嘅嘢

但當我決定接走你一刻開始, 我眼中就只係得你嘅存在

連baba 無手拎嘢... 打俾朋友幫手車嘢之類之類嘅事, 我都無參與其中


其實無人話俾我知你幾時生日, 只係狗舖話我買你前一日打咗針, 而打針時足兩個月

所以我只係將打針日再推前兩個月, 所以你嘅誕生日就係 20/9/2008 


到養咗你之後, 先開始從網上嘅世界去關心養狗嘅資訊

先知道原來勝利道買狗係好危險, 而買你嘅商店亦係黑店名單之一

如夢初醒嘅我先開始擔心你嘅身體會唔會唔舒服, 有傳染病等等

萬幸嘅係你非常健康加調皮

每日你總會諗到新嘅破壞去獲取我嘅注意, 

特別每日你都會拆一次你個廁板, 即使換完再換, 你都有本事成個拆開,並附送將片片粉碎

如果你知道個開關係邊, 你就會不停每日咁去解開個開關

白花油, 辣椒油會用過, 但你好似愛上咗白花油辣椒油陣味咁


而因為當時第一隻狗, 我用好多心神去教你指令

而你只要兩三日, 每次五份鐘,  你就會學識一個新指令

嗰時心諗, 原來教指令都唔太難

但到麥皮嚟咗之後, 先發現, 原來都要睇本身狗狗嘅腦筋

好明顯麥皮唔係聰明嗰批 



咁耐以嚟, 我哋都嗌過你好多名,

除咗奶茶之外, 花名包括: 哥哥, 阿仔, 肥仔, 肥佬仔, 傻佬仔

你都好以知道係嗌你咁, 一定會望返轉頭 (當然有時嗌麥皮同阿妹時你都有認啦 )

唔經唔覺咁就過咗差唔多四年

你記唔記得, 上個星期, 你同mami鈎咗手指尾

你要健健康康長命百歲架  

希望你以後嘅日子都要開開心心精精靈靈


以前啲相唔知點解好鍾意成張水印簽名 
(1)

(2)



(3)

(4)


(5)



生日, 梗係要有生日蛋糕啦
(6)




奶茶: 我知個蛋糕我架喎 
(7)



奶茶: 咁食得未呀?? 
(8)

奶茶: 唔係呀, 又要影相呀, 我要食餅呀 
(9)



奶茶: 咁大吸引力, 唔舔返下都對唔住自己啦 
(10)

奶茶: 好啦好啦~ 多謝mami baba啦 
(11)