24/6/2011 二十歲嘅阿b, 你好勁呀

呢個blog, 我連自己嘢都好少提起

但今次真係想打一篇完全無奶茶麥皮嘅

因為關於一隻我以前養過嘅狗~阿b

佢係我以前喺屋企養過嘅第二隻狗

仲係我帶返去養

 

喺我讀書時,

佢本身係一隻流浪狗,

日日陪住我一個守山邊嘅警察朋友巡邏

有一日, 我朋友喺旺角揸車時竟然見到佢

於是帶咗佢上車, 但屋企唔養得, 於是問我有無興趣

我當時諗都無諗就決定帶佢返屋企

 

阿b真係好乖, 唔會周圍去廁所, 唔會亂吠

仲識sit同hand

但當時嘅我太細個唔識諗... 無足夠嘅養狗知識之餘

仲諗唔到好多問題要面對

包括住公屋嘅我, 同唔鍾意狗嘅屋企人

結果因為多次投訴同屋企人嘅反對後, 無奈要將阿b送走

幸好當時哥哥嘅一位朋友樂意收養阿b

但其實呢位朋友我唔熟絡, 所以往後嘅日子都好少見到阿b

亦由於宜家嘅科技太過發達, facebook加whatsapp令我同呢位朋友聯上

而且相約探佢

二十歲嘅阿b, 已經係一位老伯伯, 右眼白內障, 左眼櫻桃眼

後肢乏力但仲行到, pat pat亦有一個腫瘤

見到我行近同佢打招呼依然會非常開心咁回應我

而且仲堅持每日落街先去廁所

真係好叻仔

 

其實喺未見阿b之前, 我已經諗咗好多嘢

諗起嗰時, 阿b為咗抗議我唔帶佢落街, 咬爛咗我部call機 (註: 我係一個擁有call機嘅好學生)

除咗呢次之外, 佢無試過激到我紮紮跳

亦喺養咗奶茶麥皮之後, 更加覺得我當時太缺乏個責任心

同埋遺棄轉主人係對狗狗有幾大打擊

更令我對阿b內疚

仲有, 就係流浪狗, 混種狗, 係非常聽話易教

同估唔到嘅健康... 我聽朋友講, 阿b都係因為老先開始出現咁多問題

 

雖然您宜家已經有老態, 但喺我心目中依然係健壯有型嘅您

 

食飽飽仲一副想添飯嘅樣~ 真係好可愛

 

落街去完廁所行一陣就要抖一陣~ 但都係自己完成全程~

 

因為我驚抱傷佢, 所以扒喺地同佢影, 其實好想攬實佢

 

喺等朋友時見到嘅天色