15/7/2011 奶茶: 我俾哈姆太郎纏身呀

奶茶:

今日baba剩係帶我一個去街街~ 仲行咗四個字先見到mami

但我認得呢個鬼地方~ 去親都無好嘢架喎

不過啲姑娘姐姐好靚~ 所以我好開心

姐姐仲見我咁開心俾零食獎我添呀

姐姐獎完食食之後就要磅重~

4.6KG mama話我比起年頭打針重咗一磅喎~ 所以要減糧啦

減返一磅先

 

講返點解我要睇醫生先

事源因為我耳仔發炎, 又紅又臭又多皮屑

Mami唔想咁快就用藥

所以用消炎洗耳水早晚幫我洗咗好一陣子, 都見未有起色

於是帶我去探下醫生

醫生一見我耳仔就話係酵母菌

開一隻耳油俾我, 要早晚滴一次, 一個療程要兩至三個禮拜

但擔心有抗藥, 如果唔好就要換過另一隻

醫生好細心咁解釋洗耳仔程序俾mami知,

不過mami都無做錯~ 所以姑娘都奇怪點解仲會發炎

醫生仲叮囑mami唔好用棉花棒幫我洗耳仔住~ 驚耳仔入面有傷口會整痛我

話咁快就出返去啦~ 一出去mami仲話我感染哈姆太郎喎

 

喺mami俾錢期間, 有隻貓貓同主人入咗嚟

但mami關住俾錢同問姑娘啲耳油點用無留意

點知突然有人嗌我"奶茶?"

mami先見到原來係朋友帶貓貓賊仔嚟覆診

賊仔因為肥過龍, 肥肉遮住眼睇唔到嘢

因擔心有不良影響要做手術切咗頭仔嘅肥肉

mami見到額頭嘅一行聯針, 真係心都痛埋

賊仔因為困籠發脾氣... 撞爆咗傷口, 仲要唔肯飲食

結果發燒脫水要吊鹽水

希望賊仔乖乖地唔好再扭計~ 快啲好返啦

 

已經睇完醫生, mami先話要影張相喎

 

 

其實耳仔已經洗過, 所以睇唔到好多皮屑

 

就係呢隻耳油啦~ 希望生生性性醫得返好我啦

 

後記: Mami: 用咗兩日耳油, 紅腫情況真係有改善, 而我亦都搵咗啲關於酵母菌嘅資料.

原來酵母菌無處不在, 如果狗狗體質出現過敏/或者一啲適當嘅環境, 就會出現反應,

例如, 濕潤嘅耳仔, 所以我相信因為奶茶游完水無即時整返乾令佢產生問題

 

當晚望出窗發生異象 已經八點天水圍嗰邊竟然好光咁

mami仲話有UFO~ baba話可能有山火

但經過一輪研究後, 嗰啲應該係雷暴

而有關雷雨吹咗過嚟之後... 怪光亦無咗lu